Qazaqstan Respýblıkasynyń Memlekettik Týy

Qazaqstan Respýblıkasynyń Memlekettik Týy - ortasynda shuǵylaly kún, onyń astynda qalyqtap ushqan qyran beınelengen tik buryshty kógildir tústi mata. Týdyń sabynyń tusynda ulttyq órnek tik jolaq túrinde naqyshtalǵan. Kún, onyń shuǵylasy, qyran jáne ulttyq órnek beınesi altyn tústes. Týdyń eni men uzyndyǵynyń araqatynasy - 1:2
Qazaqstan Respýblıkasy Memlekettik týynyń birkelki kógildir túsi birigý ıdeiasyn bildirýmen qatar, árqashanda beıbitshiliktiń, tynyshtyq pen jarqyn bolashaqtyń belgisi sanalatyn bultsyz ashyq aspandy eske salady.
Geraldıka tilinde kók tús pen onyń reńkteri adam boıyndaǵy adaldyq, tazalyq, úmit sıiaqty qasıetterine sáıkes keledi. Shuǵylaly altyn kún tynyshtyq pen baılyqty beınelese, dala búrkiti qazaqstandyqtar uǵymynda darqandyq pen qyraǵylyq, bıiktik belgisi.
Qazaqstan Respýblıkasy Memlekettik týynyń avtory sýretshi Sháken Nıiazbekov.

Qazaqstan Respýblıkasynyń Memlekettik Eltańbasy

Qazaqstan Respýblıkasynyń Memlekettik Eltańbasy - dóńgelek nysandy jáne kógildir tús aiasyndaǵy shańyraq (kıiz úıdiń joǵarǵy kúmbez tárizdi bóligi) túrinde beınelengen, shańyraqty aınala kún sáýlesindeı tarap ýyqtar shanshylǵan. Shańyraqtyń oń jaǵy men sol jaǵynda ańyzdardaǵy qanatty pyraqtar beınesi ornalastyrylǵan. Joǵarǵy bóliginde - bes buryshty kólemdi juldyz, al tómengi bóliginde «Qazaqstan» degen jazý bar. Juldyzdyń, shańyraqtyń, ýyqtardyń, ańyzdardaǵy qanatty pyraqtardyń beınesi, sondaı-aq «Qazaqstan» degen jazý - altyn tústes.
Qazaqstan Respýblıkasynyń Memlekettik eltańbasynyń negizine shańyraq alynǵan. Ol eltańbanyń júregi ispettes.
Shańyraq álemniń birtutastyǵyn, memlekettiń bastaýy otbasy oshaǵyn beıneleıdi. Qanatty tulpar máńgilik ómir, sheksiz damý jáne Qazaqstan sekildi bir shańyraq astynda ómir súrip jatqan halyqtardyń rýhanı baılyǵynyń belgisi. Qanatty tulpar bolashaqqa úmit artar jas urpaqtyń armany, samǵaý bıigi.
Eltańba tóbesinde bes buryshty juldyz bar. Ár adamnyń ómirinde jol kórseter óz juldyzy bolady. Memlekettiń de osyndaı juldyzy bolýy kerek.
Qazaqstan Respýblıkasy Memlekettik eltańbasynyń avtorlary sáýletshiler Shota Ýálıhanov pen Jandarbek Málibekov.

Qazaqstan Respýblıkasy Memlekettik Gımni

Sózin jazǵandar:
Jumeken Nájimedenov
Nursultan Nazarbaev

Ánin jazǵan:
Shámshi Qaldaiaqov

Altyn kún aspany,
Altyn dán dalasy,
Erliktiń dastany,
Elime qarashy!
Ejelden er degen,
Dańkymyz shyqty ǵoı.
Namysyn bermegen,
Qazaǵym myqty ǵoı!

Qaıyrmasy:
Meniń elim, meniń elim,
Gúliń bolyp egilemin,
Jyryń bolyp tógilemin, elim!
Týǵan jerim meniń – Qazaqstanym!

Urpaqqa jol ashqan,
Keń baıtaq jerim bar.
Birligi jarasqan,
Táýelsiz elim bar.
Qarsy alǵan ýaqytty,
Máńgilik dosyndaı.
Bizdiń el baqytty,
Bizdiń el osyndaı!

Qaıyrmasy:
Meniń elim, meniń elim,
Gúliń bolyp egilemin,
Jyryń bolyp tógilemin, elim!
Týǵan jerim meniń – Qazaqstanym!